|
Plaas media@liginduisternis.co.za in jou adresboek om te verseker dat jy hierdie e-pos ontvang. Indien hierdie e-pos nie reg vertoon nie, kyk na die aanlyn weergawe. |
11 - 2025 |
Die einde van ’n jaar bring altyd ’n mengsel van gejaagheid en dankbaarheid. Lysies moet voltooi word, take afgehandel word, maar dit is ook ’n kosbare tyd om stil te staan en terug te kyk na wat bereik is. Nog belangriker: Om te besef hoe die Here se teenwoordigheid jou deur elke stap gelei het en wat jy vir sy koninkryk kon doen.
In sy liefde herinner God ons dat rus net so noodsaaklik soos werk is. Mag jy hierdie feesseisoen ingaan met die bewuste keuse om in sy rus te leef. Neem tyd om saam met Hom te reflekteer oor die jaar wat verby is, en om jou planne vir die nuwe jaar in sy hand te plaas. Wat ook al swaar op jou hart lê, bring dit na sy voete. Vertrou Hom met alles deur vurige gebed.
Ons wens jou ’n geseënde Kersseisoen toe. Mag God se genade jou dra en versterk sodat jy die laaste deel van die jaar met vrede en vreugde kan voltooi.
|
Gebeure |
KATTEKLETS WENNERS AANGEKONDIG
Lig in Duisternis Uitgewers is verheug om die wenners van Katteklets: Die katte van Kathu-skryfkompetisie aan te kondig.
Kinders tussen die ouderdom van 5 en 18 jaar het die geleentheid gehad om groot kontantpryse met hul skryfwerk te wen. Hulle kon in vier kategorieë deelneem. Die deelnemers moes ’n katkarakter uit Die katte van Kathu sit hul dorp oppie mêp deur Adriaan Swanepoel kies en dit die hoofkarakter in hul eie verhaal of video-vertelling maak.
Die wenners is soos volg:
5 tot 7 jaar: Josua Fourie (CVO Skool Potgietersrus)
8 tot 10 jaar: Mia le Roux (Laerskool Mooirivier)
11 tot 14 jaar: Carine Möller (CVO Skool Potgietersrus)
15 tot 18 jaar: Maria du Plessis (Tuisskool)
Afriforum was die borg van die kontantpryse. Die wenners het onderskeidelik R1 000, R2 000, R4 000 en R5 000 per kategorie in die sak gesteek. Die jongste ouderdomsgroep kon ’n video-vertelling inskryf terwyl die ander ouderdomsgroepe geskrewe verhale wat aan ’n streng woordtelling onderwerp was, kon inskryf.
Volgens ds. Schalk Strauss, publikasiehoof van Lig in Duisternis Uitgewers, het hierdie kompetisie die lees-en skryfvaardighede van kinders bevorder. “Ons wou ook ’n projek ter viering van Afrikaans se amptelike 100ste verjaarsdag loods. Kinders is die toekoms van die land en hulle kon ’n inspirerende kinderboek in hul eie taal lees, en daaroor skryf,” het hy gesê.
Die beoordelaars was onder meer die skrywer van die kinderboek, Adriaan Swanepoel, en Alana Bailey van AfriForum.
“Ek het die verhale en video’s ongelooflik baie geniet. Die deelnemers was uiters kreatief,” het Bailey gesê.
“Die deelnemers wat nie gewen het nie, het ons ook beïndruk en moet asseblief aanhou skryf,” het Swanepoel afgesluit.
Lees en kyk na die wenners se verhale hier.
|
|
KINDERBOEKE WEER DEEL VAN SKOOLTASSIE-PROJEK
Lig in Duisternis Uitgewers is dankbaar om deel te kan wees van Solidariteit Helpende Hand se Skooltassie-projek. Hierdie projek voorsien sedert 2007 landswyd goed toegeruste skooltassies aan behoeftige graad 1-leerlinge. Die projek help nie net kinders nie, maar bevorder ook gemeenskapsbetrokkenheid.
Deur die ruim bydrae van ’n goedhartige donateur kon Lig in Duisternis Uitgewers 2 000 eksemplare van Die wit rokkie deur Annamarie du Toit skenk. Die verhaal beeld die kern van die evangelieboodskap uit en help kinders om Christus se plaasbekledende offer te verstaan. “Ons glo dat boeke nie net kennis bring nie, maar ook hoop. Vanjaar kry 2 000 kinders wat ’n skooltassie ontvang, ook ’n boodskap van geloof en hoop,” aldus ds. Strauss, publikasiehoof van Lig in Duisternis Uitgewers.
Elke tassie het ook ’n skêr, ’n liniaal, gom, uitdraaikryte, HB- en kleurpotlode en ’n pennesakkie.
Lig in Duisternis Uitgewers bly getrou aan sy visie om publikasies uit te gee wat sy lesers se geloofsgroei ondersteun om die waarheid van God se Woord beter te verstaan sodat hulle dit prakties kan uitleef.
Instansies en organiasies word aangemoedig om ook by die projek betrokke te raak. Besoek gerus Solidariteit Helpende Hand se webblad indien u ’n bydrae tot die Skooltassie-projek wil maak.
NUWE PUBLIKASIES
 |
Die Nuwe Testament met die kanttekeninge 1933/53 vertaling
Die Stigting Reformatoriese Getuienis het die kanttekeninge van die Nederlandse Statebybel in Afrikaans vertaal. Hierdie kanttekeninge gee betroubare en Skrifgetroue verduidelikings wat die Woord van God meer verstaanbaar maak. Dit bring die erfenis van die Reformasie tot in jou huis en dra die ryk geloofskennis van die kerk deur die eeue oor. Die Statevertalers het goeie werk gedoen en hul kanttekeninge word wyd erken. Nou kan jy hierdie kosbare hulpmiddel in Afrikaans gebruik – vir jouself, jou gesin en jou gemeente. Die amptelike vrystelling is op 16 Desember 2025. Versending sal eers ná 5 Januarie 2026 geskied. Voorafbestellings is ook beskikbaar. Bestel jou kopie teen slegs R185. |
 |
Voeg by julle geloof …
In ’n wêreld vol uitdagings en versoeking, roep God ons op om deugsaam te leef – nie in ons eie krag nie, maar in die krag van sy Heilige Gees. Bestel vandag jou eksemplaar teen slegs R165. |
 |
Wie sê julle is Ek?
"Wie sê julle is Ek?" – die vraag wat Jesus sy dissipels in Matthéüs 16:15 gevra het en dit bly steeds die belangrikste vraag wat ons vandag moet beantwoord. Wie sê julle is Ek? bevat die drie algemene belydenisskrifte (Apostoliese Geloofsbelydenis, Geloofsbelydenis van Nicéa, Geloofsbelydenis van Athanasius), die Drie Formuliere van Eenheid (Nederlandse Geloofsbelydenis, Heidelbergse Kategismus, Dordtse Leerreëls), ’n beknopte historiese oorsig oor elk van die belydenisskrifte, asook volledige Skrifverwysings. Bestel jou kopie teen slegs R100 en belê in die geloofsopvoeding van jou gesin en jou eie geestelike groei. |
Redakteursforum
Ds. Schalk Strauss, publikasiehoof van Lig in Duisternis Uitgewers en redakteur van die AP Kerk se kerkblad, Die Boodskapper, gesels van Liezil van der Schyff van PretoriaFM op Redakteursforum oor die November-uitgawe van Die Boodskapper.
Luister hier.
Die Boodskapper
Lees hier om te sien wat die toepassing jou alles bied.
Laai gerus die toepassing by Google Play Store of Apple App store af.
|
Winskopies |
 |
|
|
Dagboek vir Desember |
12 Desember: Lig in Duisternis Uitgewers sluit |
|
Handelaarsregistrasie |
|
|
|
Lees … enige plek, enige tyd! |
|
|
|
Taalwenk van die Maand |
Skryf ‘n resensie |
|
|
|
|
|
|
|
|