Wêrelddag vir Vriendskap op 30 Julie, is die perfekte dag om oor die waarde van ware vriendskap na te dink. Daar is ‘n Afrikaanse spreekwoord wat lui: “Aan jou vriende sal jy geken word.” Hierdie wysheid beklemtoon die belangrikheid van die tipe vriendskappe wat ons kies om ons lewens mee te verryk. Ons vriende is die mense wat ons hartsgeheime ken, ons in tye van nood ondersteun en ons inspireer om beter weergawes van onsself te wees.
Die Bybel leer in Spreuke 27:17: Yster slyp yster, so slyp die een mens die persoon van die ander. Dit herinner ons daaraan dat goeie vriende ons vorm en skerp maak, soos ‘n ystersmid sy gereedskap slyp om dit meer nuttig te maak om sy werk beter te kan voltooi. Ons moet dus opmerksaam wees oor wie ons in ons binnekring toelaat, aangesien hierdie mense groot invloed op ons geestelike en morele vorming het.
Dit is só belangrik om vriende te kies wat in ons waardes en geloof deel, wat ons opbou en aanmoedig om op die regte pad te bly.
Hoewel nie alle vriendskappe ewe diep en intiem is nie, moet ons tog seker maak dat ons vriende mense is vir wie ons nie skaam is nie. Ons moet daarop kan staatmaak dat hulle die beste in ons na vore sal bring en ons met wysheid en liefde sal bystaan wanneer ons dit die nodigste het.
Mag ons altyd onthou dat ware vriendskap ‘n geskenk van God is, en dat ons aan ons vriende geken én deur hulle gevorm word.