Lig in Duisternis Uitgewers stel ’n landswye veldtog bekend rondom die hemelvaart van Christus, met ’n openbare manifes wat alle Christene, skole, gemeentes, organisasies en owerhede oproep om die Koningskap van Jesus Christus openlik te erken en prakties te eer.
Die veldtog, wat ’n aanlyn petisie en ’n aflaaibare manifes insluit, het ten doel om bewusmaking te skep oor die betekenis van Hemelvaartdag in die openbare lewe van Suid-Afrika.
Ds. Schalk Strauss, publikasiehoof van Lig in Duisternis Uitgewers, verduidelik die motivering agter die veldtog: “Die hemelvaart van Christus is nie ’n klein liturgiese fees vir vrome mense nie. Dit is die grootste troonsbestyging in die geskiedenis. Wanneer ons Hemelvaartdag stilmaak of van ons openbare kalenders verwyder, is dit nie neutraliteit nie. Dit is ’n keuse teen die erkenning van die ware Koning.”
Die manifes, getiteld Die hemelvaart van Christus: ’n Openbare belydenis van troonheerskappy, is gegrond in die Skrif en die Drie Formuliere van Eenheid en spreek vyf kernwaarhede aan: Die troonsbestyging van Christus as die grootste gebeurtenis in die geskiedenis, die politieke en openbare aard van Hemelvaart, die mandaat wat Hemelvaart aan die kerk gee, die bevestiging van die waarde van menswees en die krag van gebed wat in Christus se hemelvaart geanker is.
“Ons sien ’n toenemende tendens waar Hemelvaartdag uit skole, instellings en die openbare bewussyn verdwyn,” aldus Strauss. “Maar die kerk kan nie hieroor stilbly nie. Jesus Christus het die troon bestyg. Hy regeer nou oor alle dinge. Dit is ’n werklikheid wat ons openbaar en herhaaldelik en sonder verontskuldiging moet bely.”
Die veldtog rig homself spesifiek op vier teikengroepe: Kerke en gemeentes wat Hemelvaartdag amptelik wil vier en die manifes wil gebruik as grondslag vir prediking en gemeentelike betrokkenheid; skole en opvoeders wat Hemelvaartdag op hul kalenders en in skoolprogramme wil herstel; gesinne wat die dag bewustelik as ’n geloofsdaad wil vier; organisasies en leiers wat openbare standpunt inneem rondom die Koningskap van Jesus Christus.
Strauss benadruk dat die veldtog meer is as ’n eenmalige geleentheid: “Ons hoop dat hierdie manifes ’n beweging sal begin, nie ’n beweging van mense nie, maar ’n herbevestiging van die ewige waarheid: Jesus Christus is Here. Aan Hom behoort die heerskappy, die mag en die heerlikheid, nou en vir ewig. Ons roep elke gelowige, elke gemeente en elke instelling op om dit hardop te sê.”
Die manifes is gratis beskikbaar as ’n aflaaibare PDF op die veldtogwebblad, en die aanlyn petisie is nou oop vir ondertekening. Hierdie petisie sal uiteindelik aan verteenwoordigers in die regering gestuur word. Ds. Schalk Strauss is beskikbaar vir onderhoude onderhewig aan skedulering.
Laai die manifes hier af en teken die petisie.