Lig in Duisternis Uitgewers se nuutste publikasie, Paulus se groot brief deur J Aaron White, is ’n kindervriendelike gids deur die boek Romeine en is gemik op Bybellesers tussen die ouderdom van 8 en 12 jaar.
Die oorspronklike werk, Paul’s Big Letter, is in 2020 in Kanada gepubliseer en het wye erkenning ontvang as ’n waardevolle hulpmiddel vir gesinne, die kerk en skole. Die Afrikaanse vertaling is nou vir die eerste keer plaaslik beskikbaar.
Ds. Schalk Strauss, publikasiehoof van Lig in Duisternis Uitgewers, sê die boek vul ’n lank bestaande leemte in Afrikaanse Christelike kinderliteratuur. “Ons het geweet dat hierdie boek ’n behoefte aanspreek wat baie ouers en kerke al jare lank ervaar. Romeine is ’n boek vol diep, lewensveranderende waarhede, maar dit was tot dusver baie moeilik om dit op ’n toeganklike manier aan jonger kinders te verduidelik. Paulus se groot brief doen dit op ’n wyse wat beide Skrifgetrou en kindervriendelik is.”
Die boek sluit aan die einde van elke hoofstuk ’n hoofidee, besprekingsvrae en ’n sleutelvers in wat gememoriseer kan word. Dit maak dit geskik vir gebruik tuis, in die kerk en in Christelike skoolkurrikulums.
Paulus se groot brief is nou beskikbaar by Lig in Duisternis Uitgewers teen R150. Bestellings kan aanlyn geplaas word of hul boekwinkel kan besoek word.